அடிமட்டம்

வருடம் ஒருமுறை

இயந்திரங்கள் உருண்டோடி
நேர்த்தியாக்கப்படும்
பாலத்தடி றோட்டு
அடிமட்டம் வைத்து
அடித்ததுபோல் நேராக இருக்கும்
பக்கத்து வயலில்
உள்ளவர்களுக்கெல்லாம்
இதுதான் புதினம்
மாரிமழை தொடங்க
பாலம் தாண்டி வெள்ளம்
மூடி ஓடும்

ஐயோ புதுசாய் போட்ட றோட்டு
அத்தனை மனதும்
அறுந்து விழும்
ஓடி ஓய்ந்ததும்
புட்டிகள் முளைத்தபடி
அரிச்சோடிய பழையறோட்டு
எட்டிப்பார்க்கும்
எங்களுக்கு இது போதும்
மேல் மட்டத்திற்கு என்ன வேலை
அலுத்துக்கொள்ளும்
யாரிலும் நோகாத மனங்கள்

தமிழீழ விடுதலைப் புலிகளின் கலை, பண்பாட்டுக் கழகத்தின் வெளிச்சம் "புரட்டாதி - கார்த்திகை- 2002" இதழ்]